Uqophe umlando uMzokoloko we I Love Mornings

Durban, December 06, 2017:  Oshicilelweni lwangesonto eledlule ngikhulume ngokubukeleka phansi kwabasakazi abamyama. Ngibe sengithola izeluleko eziwukugxeka sakwakha, lokhu kungikhuthaze kakhulu angisho ngingananzi ukuthi ngiyayamukela futhi ngiyaykuhlonipha imibono egxeka sakwakha.  

KuleliSonto ngikhethe ukuthi sibungaze uMzokhona “Mzokoloko” Gumede  oshayela uhlelo lwasekuseni emsakazweni iGagasi FM olubizwa nge- +I Love Mornings with Mzokoloko.  UGumede uqophe umlando wokuba umsakazi wokuqala ngqa kulomsakazo kanye nasezweni lonkana ukuthi abalaleli bakhe bafinyelele kwisigidi(1 Million).

Lenqophamlando isho ukuthi loluhlelo lukaMzokoloko yilona hlelo olulalelwa kakhulu kuleli uma kuqhathaniswa neminye imisakazo yesifunda.  Lokhu kuphinde kuchaze ukuthi lomsakazo(Gagasi FM) yiwona osumkhulu ukudlula yonke imisakazo yesifunda(regional radio stations) kuleli.

Yize ngimjabulela uGumede kodwa ngijabula ngibuye nganeno ngoba ngiyazibuza nje ukuthi kophide kuthathe isikhathi esingakanani ukuthola omunye uMzokoloko ozoqopha lomlando? Kusazoba nzima ngoba abasakazi abaningi abasakwazi ukuba yibo( to be natural) uma besemoyeni kodwa benza lento ebizwa ngokuthi ukungena kwi-character.

 Uma ungumsakazi kumele ube yilento abalaleli bakho abayiyo, uphefumule umoya  abawuphefumalayo futhi ukhulume ngendlela abakhuluma ngayo.  Abasakazi abaningi abakwazi lokhu ngoba abaphili nabalaleli, abasakazi kumele bakufunde ukuphila nabaleli babo.

Nanti ke iphutha elenziwa abasakazi abaningi ukucabanga ukuthi uma sebehambe amakilabhu basuke sebefikile kubalaleli babo.Basakazi bami abahle yehlani kulamahhashi eniwagibele, abaleli atholakali  kuFlorida Road kuphela.

Phumani kuFlorida Road basakazi nihambe imihlangano yomphakathi ukuthola ukuthi yini izinkinga zabantu enibasakazelayo, phumani basakazi nivakashele amanyuvesi ukuqonda ukuthi lomphakathi ohlala ngaphakathi ucabnaga kanjani ningezwa ngendaba. Anike nibonakale nje abasakazi ngempelasonto eWena kwaMaqanda oFudu noma ezitolo ezibovu okanye eMakethe nizihambela nje ukuqonda ukuthi ngabe lomphakathi ucabanga kanjani.

Uma bonke abasakazi bengenza lokhu okungenhla ungabona zinganyuka kakhulu izibalo zabaleli futhi nabasakazi ngeke bayeswele i-Content uma besemoyeni hhayo lendaba ka “Khonza Radio”. Ayiphele lendaba ka”Khonza Radio” basakazi, philani nemiphakathi eniyisakazelayo ukuze ngelinye Ilanga nani nenze izigidi zabalaleli.