Ngijabule ngabuya nganeno uma ngizwa nge-Ntokozo FM Kanye ne eYethu FM

Durban, November 07, 2017:  NGESIKHATHI ngizwa ngemisakazo emibili emisha i-Ntokozo FM ezozinza elokishini laseMlaza kanye ne eYethu FM ezozinza eMzinyathi ngijabule kakhulu kodwa ukujabula kwami kuvele kwasheshe kwashabalala wena owabona amazolo kuphuma Ilanga.

INtokozo Yeningizumu FM kodwa ezokwaziwa ngeNtokozo Fm izoqala ukusakaza ngoLwesiHlanu lona lolu lwakusasa ku-101.2 FM kuthi i-eYethu FM ezosakazela eSkhebheni eNanda nezotholakala ku 94.4FM yona izoqala ukuzwala emoyeni ngoJanuwari.

Yebo ngiyayijabulela lemiphakathi emibili ngalemisakazo kodwa sonke siyalwazi usizi lokuntula izimali kwemisakazo yomphakathi. Izindleko zokuphatha umsakazo ziwumqansa kakhulu  njengoba lemisakazo ingatholi uxhaso kuHulumeni njengoba kwenzeka eNhlangwaneni yezokusaza i-South African Broadcasting Corporation (SABC).

Ngicabanga ukuthi uHulumeni kumele azinuke amakhwpha ukuthi akakwazi ukuzala ingane bese engayinakekeli. Umqondo wemisakazo yomphakathi kwabe kungumbono kaHulumeni njengoba noSABC kwabe kungumbono kaHulumeni, pho kungani kukhethwe iphela emasini uma sekuza ngazoxhasweni?

Enqgungutheleni ka-African National Congress eyabe iseMangaung zingama 16-20 December 2012, lenhlangano yanquma ukuthi uHulumeni kumele anyuse imali yoxhaso lwakwaSABC. Lokhu kwangishiya neminingi imibuzo ukuthi imisazako yomphakathi yona? Kungani ingacatshangelwa njengoba kucatshangelwa u-SABC.

Ngaphezu koxhaso lukahulumeni olutholwa abakwaSABC , siphinde sikhokhe imali yama-TV Licence nokwenza babe nenye indlela yokungenisa imali ngale kwezikhangizo nazo futhi uHulumeni ochitha imali eningi ekhangisa kulenhlangano.  Uma uthi uyabheka imali efakwa nguHulumeni ekukhangiseni kumisakazo yomphakathi, ungashaywa amahloni.

Uma ngingaphosisi nguMasipala weTheku kuphela onesivumelwano sokukhangisa nemisakazo yemiphathi esiyinani elingaphezu kwesigidi. Ukuze imisakazo efana neNtokozo Fm kanye ne-eYethu Fm ingashabalali kuhle kwamazolo kuzomele uHulumeni ayicabangisise lena yokwelekela imisakazo yomphakathi ngoxhaso.

Kumele sikhumbule ukuthi yize abasakazi kulemisakazo yomphakathi bengamavoluntiya kodwa lokho akusho ukuthi abanazo izidingo. Badela izimpilo zaba benqamula ezindaweni ezinobungozi beyosakaza ngenxa yokuthi abanayo imali yokugibela. Kweminye imisakazo yomphakathi isimo sibheda ngedlela yokuthi ayikwazi ngisho ukukhokhela i-rent yezindlu zokusakazela, amanzi kanye nogesi. Eyocingo ke angiyikhulumi iba yivela kancane kulemisakazo.  

Ngicabanga ukuthi uHulumeni uma engafuni ukunikeza imisakazo yomphakathi imali njengoba benza kwaSABC okungenani kumele athatha izndleko zemibhoshongo yokusakaza, imali yerenti bese ubeka isamba esayizwayo sezikhangiso. Lokhu kuzolekela lemisakazo ukuthi ikwazi ukukhokhela amavolontiya ayo. Hhayi ukuthi ngithi lemisakazo emibili ngeke iphumelele kodwa ngicela ukuqwashisa abasakazi bayo ukuthi uma bezitshela ukuthi khona itshe lemali abazolithola abakhohlwe. Nabathaphi ngokunjalo abangaqambi amanga kubasakazi bethi bazobaholela imali abazi kahle ukuthi angeke babanike yona. Kunzima bodadewethu nani bafowethu kodwa kuzomele niyibambe ishisa.  Siyayamukela iNtokozo Fm kanye ne-eYethu Fm.