Usenkingeni u-SABC

Awu bandla kwaphela kanjalo ngoMaMlabo. Kuqhume umkikizo kubuya umdlalo oyintandokazi i-Ashes to Ashes kwa Etv. Lomdlalo nawo ongena ngehora lesishiyagalombili uyibhincisela nxanye i-Generations the Legacy. Uzokhumbula ukuthi lomdlalo ubophele abadlali abaningi abaxoshwa kwi-Generations ngemuva kokuthi bengazwananga ngamaholo.   Abantu balibeke ngembaba ukuthi bese bekhathele ukubeleselwa ngenyoka uMaMlabo.  Abanye bebeze besho ukuthi qhubekani nibukele uMaMlambo wenu sekubuye umdlalo wangempela manje, abanye bethi sala kahle Generubbish. Kuyiqiniso ukuthi abantu abaningi kade bebuka iGenerations ngoba ingekho ngempela into abangayibuka ngalesi sikhathi edlala ngaso. Ngiyazibuza nje ukuthi yini ngempela sibeleswele ngeGeneration the Legacy ngelesi sikhathi, kusanda kuphuma izibalo zokuthi lomdlalo awenzi kahle ngokwababukeli, umdlalo okuwona ohamba phambilu uZalo kanye ne Skeem Sami.

Impela njengoba kubuye i-Ashes to Ashes usazobhincela nxanye u-SABC, ukube bahlakaniphile bafuna ukuqhudelana no Etv ,  bekumele babuyise i-Skeem Sami ngo-8h00 ebusuku bese kuthi uMaMlambo(Generations) bamphonse ngokugamanxa kwehora lesithupha. Impela okwa-SABC okwezandla, kusazoba nzima uma sekubuye  nomdlalo uMlilo, lomdlalo nawo ovutha ungabaselwe uzothwalisa kanzima i-Soccer Zone. Kuvele kumanje loluhlelo luyakhwehlela uma sebuye umlilo luzobe impela seludonswa ngohlaka impela.

Yazi namanje ngisazubuza ukuthi ngobani ngempela laba abakhalaza ngenkathi kuthiwa uhlelo lwezimidlalo i-Soccer Zone luyavalwa. Angilingabazi ikhono likaThomas Mlabo lokwethula izinhlelo kodwa lento yeSoccer Zone ngumdlalo wezingane, lona owayethathe isinqumo sokuthi luvalwe loluhlelo wayengadlile obamaganu kwakuwumqondo ophusile lowo. Loluhlelo seluphelelwe umsoco manje bekumele ngampela luvalwe. Ngiyakhala ngodadewethu uMinenhle Dlamini, angazi ngempela ukuthi wabe eyiswaphi kuloluhlelo awukho umsebenzi wakhe, bese futhi engaqhamuki nalutho oluhlanahlosile. Umhlaziyi uSiphiwe Mkhonza, yebo walidlala ibhola kodwa naye uvele ungamuzwa ukuthi uthini ngempela, akasho izinto eziphusile nezikhombisa ukuthi wake walidlala ibhola.  Impela kusazoba nzima kwaSABC kakhulukazi kulezinhlelo i-Generation the Legacy ne Soccer Zone.