ILigwalagwala FM liyilamule kwabaningi ebebencela ngofile

Kuphelile ukuba yizintandane komphakathi waseNgwavuma, Jozini kanye nakwaMhlabuyalingana njengoba umsakazo wesiSwati, i-Ligwalagwala Fm usutholaka kulezi zindawo ku 103.5fm. Lokhu kulandela ukuthi izikhulu zomsakazo zithathe isinqumo sokugxumeka umbhoshongo kulezi zindawo. Ngithi kuphele ubuntandane nje ngoba ikulezi lezi zindawo kuphela lapha kwelikaMthaniya lapho ofica khona abantu abaningi abakhuluma isiSwati kodwa umsakazo wakuleli osakaza ngolwimi lwabo ubungafinyeleli kubona. Ngiyazi kubuhlungu kanjani ukuba sendaweni lapho ungakazi khona ukukhuluma ulwimi lwakho , lokhu obekwenzeka kulomphakathi ngikakufanisa nje nokucwasa, kodwa wona ubucwaswa ngokolwimi. Uma ukhululele kulezi zindawo uzomvumelana nami ukuthi isiteshi ebesize siyilamule futhi ekade silalelwa kakhulu kulezi zindawo kade yi-SBIS 1 (Swaziland Broadcasting Information Services 1), engani phela zisemgceleni waseSwazini. Uzophinde uvumelane nami ukuthi abantu bakulezi zindawo kade bengaphuthelwa uhlelo luka Sgayoyo Magongo lwe-Country Music  ngeMgqibelo kanti ngamaSonto ngezikhathi zantambama lapha koBambanana, Nyathini, eManyiseni , Nkungwini nakoMachobeni ubungeke udlule umuzi kulezi zindawo kungalalelwe uhlelo luka Bongani “Sqoko Siyancinca” Dlamini lapho wayesuke eqhulula khona amanoni apholile.

Ukufinyelela kweLigwalagwala Fm kulezindawo kuzosivala khaxa isikhala SBIS 1 njengoba abantu sebezothokozela izinhlelo zalomsakazo ngolwimi abaluqondayo nabaluthokozelayo. Ngiyacabanga nje ukuthi uhlelo lukaMadumane ngeSonto luzosivala khaxa isikhala sika Sigqo Siyancinca kanye nezinye izinhlelo zalomsakazo ezihamba phambili. Lomsakazo onekoMkhulu eMpumalangana uphinde utholakale koNewcastle, Dundee kanye nako Utrecht. Yize lokhu kade kungishiya nombuzo wokuthi kungani utholakala kalula kulezindawo yize bengekho abantu abakhuluma isiSwati.  Ukunabela kwalomsakazo kulezi zindawo kuzothwalisa kanzima i-Maputaland Radio njengoba ibikade izikhethela umbele ogwansile nje kulezi zindawo.  Ukunabela kweLigwalagwala Fm kulezi zindawo ngeke nje kuzuzela lomsakazo abalaleli kodwa kuzosiza ukuqinisa nokunothoisa ulwimi lwesiSwati, uzokhumbula ukuthi ngenxa yokuthi lezindawo ziphindile zisondelane nezwe iMozambique ubusuthola abantu abakhuluma ulwimi lwesithonga. Khona kusazominyana untshumo emisakazweni kulesiFundazwe njengoba neVuma Fm nayo ingazibekile phansi nayo inwenba imibhoshongo, khona maduze  nje lomsakazo uzobe sewuzwakala koLadysmith nako Newcastle

Lombiko uqale waphuma ephephandabeni Ukhasi, 07 March 2016